امبارح .. سمعت اخويا وهو بيقول لصاحبه ( البقاء لله ) ..

بصراحه انا استغربت من الجمله دي عشان قبلها بـ يوم كان بيقول لنفس الشخص ( مبروك ) ؟!!! ..

سألته عن الموضوع .. بس ياريته ما حكالي ..

اخويا قال : ان اخو صاحبه حفل خطوبته كانت اول امبارح وعشان كده كان بيقول ( مبروك )

بس بعد ما الحفله خلصت راح العريس يوصل خطيبته للبيت وبعد ما وصلها..

... وهو راجع على البيت ..

طلع عليه مجموعة بلطجيه ووقفوه واخدوا كل اللي معاه حتى العربيه بتاعته

.. وقتلوه ..

.. الله يرحمه مات قبل ما يفرح بخطيبته ..

الحكايه دي فكرتني بحكاية واحد جارنا في نفس الشارع ..

جاري ده كان بيشتغل في مجال المعمار وفي يوم اثناء ما هو شغال ..

رجله اتزحلقت من على السقاله ووقع من الدور رقم 14

بس وهو بيقع كان بيتخبط في البلكونات والمناشر والتند بتاعة الادوار اللي تحتيه ..

ولما وصل للأرض مصدقش انه لسه عايش وطبعا حمد ربنا وسجد في الارض شكرا لله

وقرر انه يعزم زمايله في الشغل على حاجه نظير نجاته من الموت ..

بس وهو بيعدي الطريق خبطته عربيه كانت جايه بسرعه في الاتجاه المعاكس ..

.... ومات الله يرحمه ويرحم امواتنا جميعا ....